Kon Kehta Hai Mohabbat Ki Zaban Hoti Hai | sahir hoshiyarpuri

کون کہتا ہے محبت کی زباں ہوتی ہے
ساحر ہوشیارپوری

کون کہتا ہے محبت کی زباں ہوتی ہے
یہ حقیقت تو نگاہوں سے بیاں ہوتی ہے 

وہ نہ آئے تو ستاتی ہے خلش سی دل کو 
وہ جو آئے تو خلش اور جواں ہوتی ہے 

روح کو شاد کرے دل کو جو پر نور کرے 
ہر نظارے میں یہ تنویر کہاں ہوتی ہے 

ضبط سیلاب محبت کو کہاں تک روکے 
دل میں جو بات ہو آنکھوں سے عیاں ہوتی ہے

زندگی ایک سلگتی سی چتا ہے ساحرؔ 
شعلہ بنتی ہے نہ یہ بجھ کے دھواں ہوتی ہے

آڈیو سننے کے لیے یوٹیوب لنک پہ کلک کیجیے