Sad Poetry | Ibn e insha

اس شام وہ رخصت کا سماں یاد رہے گا
ابن انشاء

Ibn e insha Sad Shayari

اس شام وہ رخصت کا سماں یاد رہے گا 
وہ شہر وہ کوچہ وہ مکاں یاد رہے گا 

وہ ٹیس کہ ابھری تھی ادھر یاد رہے گی 
وہ درد کہ اٹھا تھا یہاں یاد رہے گا 

ہم شوق کے شعلے کی لپک بھول بھی جائیں 
وہ شمع فسردہ کا دھواں یاد رہے گا 

ہاں بزم شبانہ میں ہمہ شوق جو اس دن 
ہم تھے تری جانب نگراں یاد رہے گا 

کچھ میرؔ کے ابیات تھے کچھ فیضؔ کے مصرعے 
اک درد کا تھا جن میں بیاں یاد رہے گا

آنکھوں میں سلگتی ہوئی وحشت کے جلو میں 
وہ حیرت و حسرت کا جہاں یاد رہے گا 

جاں بخش سی اس برگ گل تر کی تراوت 
وہ لمس عزیز دو جہاں یاد رہے گا 

ہم بھول سکے ہیں نہ تجھے بھول سکیں گے 
تو یاد رہے گا ہمیں ہاں یاد رہے گا


وڈیو دیکھنے کے لیے یوٹیوب لنک پہ کلک کیجیے

Ibn e insha Sad Poetry